જ્યારે યુગલ સરકાર વ્યાકુળ ભાવથી ગોલોક ધામમાં વિરાજમાન હતા. ત્યારે શ્રી મહાપ્રભુજીએ વ્યાકુળતાનું કારણ પૂછ્યું. ત્યારે શ્રીજીએ આજ્ઞા કરી કે, “અમારા જીવ અમારાથી વિમુખ થઈને ભૂતળ પર ભટકી રહ્યા છે, અમને તેમની ચિંતા છે. હે વલ્લભ, તમે ભૂતળ પર જઈને અમારા કૃપા માર્ગની સ્થાપના કરીને જીવોને અમારા સન્મુખ કરો.” ભગવાનની આજ્ઞાથી શ્રી વલ્લભ ભૂતળ પર પધાર્યા.

દક્ષિણમાં એક તૈલંગ કુળમાં યજ્ઞ નારાયણ ભટ્ટને યજ્ઞ કાર્યમાં રુચિ હતી. દર વર્ષે તેઓ પોતાની પત્ની સાથે સોમયજ્ઞ કરતા. જ્યારે તેમણે 35 સોમયજ્ઞ કર્યા, ત્યારે પ્રભુએ શ્રી મદન મોહન અવતારમાં પ્રગટ થઈને આજ્ઞા કરી કે તમારા કુળમાં સો સોમયજ્ઞ પૂર્ણ થાય પછી પુત્ર રૂપે સ્વયં અવતાર લઈશ.

યજ્ઞ નારાયણભટ્ટજીના વંશમાં શ્રીલક્ષ્મણ ભટ્ટજીએ સો સોમયજ્ઞ પૂર્ણ કર્યા. શ્રી લક્ષ્મણ ભટ્ટજી પોતાની પત્ની અને ગામવાસીઓ સાથે તીર્થયાત્રા માટે ગયા. ત્યારે ચંપાના વનોના વિસ્તાર “ચંપારણ”માં શ્રી લક્ષ્મણભટ્ટજીની પત્નીએ પુત્રને જન્મ આપ્યો.

પરંતુ પુત્ર મૃત હતો. આ જોઈને બંને ખૂબ દુ:ખી થયા અને પોતાના મૃત પુત્રનો દેહ ત્યાં જ મૂકીને આગળ વધ્યા. ત્યારે રાત્રે લક્ષ્મણ ભટ્ટજીના સ્વપ્નમાં પ્રભુએ દર્શન આપ્યાં અને કહ્યું કે જ્યાં તમે તમારા પુત્રને છોડી આવ્યા છો, ત્યાં પાછા જાઓ.

જ્યારે લક્ષ્મણભટ્ટજી પોતાની પત્ની અને યાત્રાવાસીઓ સાથે ફરી તે સ્થળે પાછા ફર્યા અને જોયું તો આશ્ચર્યચકિત રહી ગયા. જોયું કે વૃક્ષની નીચે અગ્નિની જ્વાળા પ્રગટ છે અને તે અગ્ની કુંડ ની મધ્ય માં એક બાળક રમી રહ્યું છે.

આ દ્રશ્ય બધા દેવતાગણ પણ નિહારવા પધાર્યા. એ જ અગ્નિકુંડ માં ખેલી રહ્યા બાળક સાક્ષાત અગ્નિ સ્વરૂપ શ્રી મહાપ્રભુજી ભૂતલ પર પધાર્યા છે.