આપણા સેવ્ય સ્વરૂપ ઠાકુરજી આપણને પોતાના નિજ જન માનીને હકથી માગે છે. આપણે આપણા સેવ્ય સ્વરૂપને પ્રાર્થના પણ તેવી જ કરવી જોઈએ કે અમારી ઉપર એવી કૃપા કરોકે, આપ અમારી પાસે પણ જબરદસ્તી થી માંગો. હઠ થી માંગો, અને જે માંગો તે અમે આપી શકીએ.

આ દાણના દિવસોમાં પ્રભુ આપણી પાસે પ્રેમથી માંગે છે. આ દિવસોમાં ખાસ સાવચેતી રાખવી જોઈએ કે ગમે તેટલું કષ્ટ કેમ ન હોય, દુઃખ હોય, દર્દ હોય, છતાં પ્રભુ પાસે કશું માંગવુ નઇ. આપને શ્રમ આપવું નહીં.

રાગ સેવા

જન્માષ્ટમી – રાધાષ્ટમી ઉત્સવોમાં પ્રભુની બાળ લીલાનો કીર્તન ગવાય છે. આ કીર્તન ગઈ કાલ સુધી ગવાય છે. અને આજથી આવતા વીસ દિવસોમાં પ્રભુની દાણ લીલાના કીર્તન ગવાશે. આ દિવસોમાં આપણે દાણ લીલાનું વાંચન કરવુ જોઈએ.

શ્રી ગુસાઇજીની રચીત (સંસ્કૃત), શ્રી હરીરાઇજીની રચીત, કુંભનદાસજીની રચીત, સૂરદાસજીની રચીત દાણ લીલા છે. આ દાણ લીલામાં આપણા સેવ્ય સ્વરૂપનો વિચાર કરીને ધ્યાન ધરવું જોઈએ, જેથી આપણને પ્રભુની આ દાણ લીલાના માનસી દર્શન થઈ શકે.

શૃંગાર સેવા

પ્રભુ ના શૃંગાર ક્રમમાં આજના દિવસે મુકુટ કાછનીનો શૃંગાર થાય છે. કેટલીક વખતે દાણ એકાદશી અને વામન જયંતી એ એક દિવસે આવે છે. ત્યારે દાણ એકાદશીનો શૃંગાર ને પ્રધાનતા અપાય છે. અને જ્યારે એક દિવસે આવે ત્યારે તેરસ ના દિવસે વામન જયંતીનો શૃંગાર પ્રભુને ધરાવવામાં આવે છે.

પ્રભુની મુખ્ય ત્રણ લીલાઓ – શરદ-રાસ, ગૌ-ચારણ, અને દાણ લીલાની ભાવનાથી – મુકુટનો શૃંગાર કરવામાં આવે છે.

ભોગ સેવા

આ દાણ ના 20 દિવસો માં આપણે આપના સેવ્ય સ્વરૂપ ને દાણ ની સામગ્રી નિત્ય ધરવી જોઈએ. દાનની સામગ્રી જો થઈ શકે તો કુલ્લડ માં જ ધરવી. કુલ્લડ માં ધરવાથી આપણને વ્રજ ની લીલા નો ભાવ થાય છે. પ્રભુ ને તો આનંદ  મળશે જ.

નોંધનીય વાત એ છે કે એક વાર જે કુલ્લડ માં સામગ્રી ધરાય એ પાત્ર પ્રસાદી થઈ જાય છે. એને ખાસા કરી ને પણ ફરીથી પ્રભુ ને ના ધરી શકાય. નવા કુલ્લડ માં જ સામગ્રી ધરવી. 20 દિવસ ના 20 કુલ્લડ ની જ આવશ્યકતા છે.